Во Музејот на современата уметност во Скопје утре во 17 часот ќе се одржи годишниот симпозиум на Меѓународното здружение на ликовни критичари – AICA Македонија. Ќе бидат доделени наградите „Ладислав Баришиќ“ за истражувачки проект и „Борис Петковски“ во три категории – за трајни вредности, за кураторски текст и за истражувачки текст.
Потоа ќе се одржи промоција на изданието „Присуство: Истражувачки текстови на добитниците на наградата,Ладислав Баришиќ‘“ и дискусија на тема „Архивирањето како изведување на критичка пракса“. Модератор е Билјана Тануровска-Ќулавковски, а говорници се Зоран Петровски, Слободанка Стевчевска (OПA), Владимир Јанчевски.
Архивата ќе биде разгледувана како жив, критички и трансформативен простор, место каде личните приказни се среќаваат со колективното сеќавање и стануваат поле за отпор, дијалог и заедничка продукција на знаење.
– Дискусијата ќе се фокусира на тоа како архивите, меѓу кои и музејските колекции можат да воспостават нови системи на вредности, солидарност и сеќавање, кога се активираат преку уметнички, активистички и кураторски процеси. Потпирајќи се на согледувањето на Чарлс Меруедер за архивата како модерен апарат преку кој се пишува историјата и се воспоставува авторитет, панелот ќе истражи како уметничките практики и независните иницијативи го оспоруваат овој авторитет преку повторно читање и преосмислување на архивата – како простор за создавање нови односи, колективни процеси и нови контексти на значење – вели д-р Ана Франговска, претседателка на AICA.
